Priya, mera Sacha pyaar…

Yeh Uss din ki baat hai, jab usse pehli baar dekha tha. Yun hi facebook pe profile stalk kar DIL khush karna meri aadat thi, Par uss din kuch alag sa mehsus hua, stalk krne ke saath Friend request waala button daba diya, Dil ko kehte hue ki shayd yahi woh hai aur dimaag ko samjhaate hue ki jo hoga ab dekha jayega.. Uss din raat ko sone se pehle sirf uska chehra saamne aa rha tha, aur woh ek choti si muskaan mere chehre par chaa rhi thi.

Aksar meri Friend requests cancel yaan ignore ho jaati thi, par shayd Bhagwaan mujhse khush tha, aur yeh waali request accept hogyi. Woh school se ghar aake phone mein notifications check kar request accept hone ki Notification dekh jo khushi hui, janaab aaj tak Navratro Ke baad Chicken ko dekh ke bhi nhi hui.  Ussi samay, apne Padosi ko maine itne Pyaar bhare gaane sunaye, ki bechaare, aaj woh 2 se 3 ke mata pita ban gye hain..

Usko apni friendlist mein dekh kar ek alag si khushi hoti thi. Par roz himmat jutane ki koshish bhi kabhi nakaam na hui. Himmat uss se baat karne ki, himmat uss se apne dil ka izhar karne ki, himmat usko apne jeevan ki saari khushiyan dene ki.

Din raat doston se sahaara maang ke, facebook/ instagram/ snapchat pe woh Deep thoughts waale pages ko follow karke bahut mushkil se ‘hey’ bhejni ki himmat hui thi. Kismat kaho yaan kudrat ka karishma, usne bhi ‘hi’ bhejne mein der na kari. Fir toh Jo seekha tha, jo samjha tha, sab kar daala. Raat raat bhar Chadar ke neeche mobile chupa ke, subha good morning and raat ko good night ke messages bhej ke, ‘Khaana khaaya mele Babu ne’ wale messages bhej ke uske chehre pe woh ek pyaar bhari smile bhi le aaya. 

Andar se ek Khushi mehsus hui, laga ki ab shayd meri Zindagi mein bhi koi hoga jiski photo main share karke caption mein ‘I love You’ likhun. Bahut Garv hua apne aap pe uss din jab usne khud milne ke liye bulaaya, turant apni behn ko phone kar maine uske liye gift liya pyaara sa, chocolates li, flowers liye aur chal pada apne raaste pe, ek aisa raasta jo mujhe bahut suhaana lag rha tha.

Usne mujhe dur se ishaara kiya, aur muskuraate hue mere pass aaya, mujhe laga ki shayd koi jaan pehchaan ka hoga yaan chair lene aaya hoga, par jab woh pass aaya toh usne mujhe Muskuraake bola, ‘May I sit’. Yun toh main chahta nhi tha ki woh wahan bethe kyunki shayd uss Ladki ko lagta ki aaj ke din bhi main dost ko saath lekar aaya hun par jab usne bola ki woh main hi hun, jisse tum milne aaye ho, toh mana na kar paaya..

Main bahut Asuvidha mein tha aur soch rha tha ki yeh mere saath kya hua? main toh Priya se milne aaya tha toh yeh kahan se aagya, par tab mera dimaag chala pehle baar aur Samajh aaya ki yeh koi aam Priya nhi, yeh toh Angel Priya tha..

 

Advertisements

Pyaar..

Humaare maa baap humaare liye sabkuch hote hain, maa baap nhi toh aisa ek insaan humaari zindagi mein zarur hota hai jo hume sahaara deta hai jab hum chal nhi paate, humme sahi galat sikhaata hai jab hum kisi ko maarte hain, humme woh saari cheeze deta hai jiske liye hum zid karte hain, aur humaari har naadani ko Mazak samajh hass deta hai.

Woh aur kuch nhi but unka pyaar hi hai ki hum jald hi itne bade hojaate hain ki ab uski zarurat nhi hoti humme unn khatarnak faisle lene ke liye. Par woh pyaar hi humaari zindagi ko ek aise mor pe le aata hai, jahan hum pyaar sirf mazaak ban ke reh jaata hai. 

Humme bachpan se pyaar ki itni aadat hojaati hai ki hum bade hokar uss pyaar ko dhundhte hain. Uss pyaar ko jo shayd humme kabhi na mile yaa shayd humme uss pehli nazar mein mil jaaye. Par yeh aisa pyaar hai janab, jisse milta hai, woh iss duniya ka sabse khush naseeb kehlaata hai aur jisse nhi milta, usse log jaante hi nhi, isi liye woh ussi raah pe chalta rehta hai..

Aaj ke zamaane mein, woh ek khubsurat ladki ko ‘I LOVE YOU’ bolna utna hi asaan hai jitna ek whatsapp ke chain message ko forward karna hai. Tabhi iss pyaar ko logon ne badnaam kar rakha hai unn chain messages ki tarah.

Log kehte hain yeh pyaar-wyaar sab mazaak hai, dhokha hai sabse bada, par mere dost, tumne abhi tak kahan pyaar kiya hai kisi ko? Tumne kahan kisi aur ki uss muskurahat mein apni khushi paayi hai, kisi aur ki unn naadaniyo pe hasna seekha hai, kisi ki woh zidon ko muskuraate hue poora kiya hai?

Toh tum kaise uss pyaar ko bewafa, behaya, Dhokebaaz keh sakte ho mere dost?? Pyaar ek aisi cheez hai jisse karna bahut mushkil hai mere dost, aur bahut kam log aajtak seekh paaye hain pyaar karna. Isse itni asaani se badnaam na karo, kuch log jeete hi sirf iske liye hain..